الزمان هُوَّ الزمان

، بقلم بدعي محمد عبد الوهاب

قالوا زمان معدن أصيل
فيه الجمال والله اتخلق
والله حرام نسمع كلام
ف الأصل مرسوم ع الورق !!!
مين اللي قال موسى النبي
من نسله فرعون اتخلق
مين اللي قال
الخير بيهرب مننا
والحب في عيونا اتشنق
مين اللي غيَّر ف التاريخ
ورسم حياتنا كلها
ذلّ وتعب نيل واتخنق
لو كان زمانكم كله خير
كان يبقى فينا برضه خير
شاهد عليه ربّ الفلق
...
قالوا زمان كنَّا ملايكه
والحقيقة إنّهم قتلوا الأمل
أنا لسه فاكر لما كانوا يقلّدوا
أبو بنطلون خُفّ الجمل
والشّعْر منكوش زىّ غابة
فيها طبعًا مخلوقات شيء مُحتمل
يعني الزمان هُوَّ الزمان
والخلايق شكل الخلايق
والعمل نفس العمل
يعنى الخلاصة إنّنا
من غير عمل
ملناش أمل
...
الحكاية إنّكم كنتم آباء
واحنا الخَلَف
لو كان نضالكم اتوجد
كانت حياتنا أصبحتْ عزّ وترف
بس الحكاية إنّنا
شعب معصوم م الخطأ !!!!
صعب نغلط مرَّه نيجي ونعترف

قاعدين نقول الماضي كان
يا ريت م كان
كان يومها يمكن نفتكر
إزّاى نكون
إزّاى نغوص ونجيب صدف
إزّاى نعيش
وقلوبنا في عيونها الهدف
إزّاى نحقّق حلمنا
مصر العظيمة والسودان
سوريا العراق أرض النجف
والقدس بتقول يا حلب
والشال بيكشف خدّها
نادت حرام يا ابن العرب
ماتت خلاص النخوه فينا
وابتدينا وانتهينا
واكتفينا بكلمتين وقت الخُطب
والخطيب قاعد يقول ف كلام غريب
الماضي كان !!!!
يا ريت م كان
كان يومها يمكن نفتكر
إزّاى نكون
إزّاى نعيش من غير هرب
إزّاى نعيش عيشة عرب
إزّاى نغوص ونجيب صدف
ازّاى نعيش
وقلوبنا في عيونها الهدف
وإزّاى نموت علشان هدف
...

من نفس المؤلف