الأحد ٣٠ تموز (يوليو) ٢٠٠٦
بقلم منال درويش

العتمة سور

العتمة سور

يهدم جسور

والنور يدور

تايه ….بحور

والسنابل لو تقابل …خوف !!

تثور ….!!

تنفض الليل اللي ساكن

ف العيون….!!

تنزع الموت اللي عشش

ف الجفون

تخلع القلب اللي خاين

من جدوره

تروي جسر الشوق بدمي

نهر سايل ف بحوره

أعلنوها صوت وصورة ….!!

حلمنا مادد جسوره

حلمنا طارح رجال

طاوي ليله بالنهار

زارع الضي الأماني

لا يا بكرة …لا يا بكرة

مش ح نرضى ا لانكسار

اعلنوها صوت وصورة

ناري تحرق

الف دار عششت فيها العناكب

داست الأفراح مواكب

والجنازة مش إجازة للتساهل !!

ولاّ حلمي ورقة خضرة

اسم ممنوع م التداول

ولا كلمة راح تواسي

دمعة حرة ..

تمسح الجرح اللي دامل

لا يا شمس الصبح ثوري

انزعي توب التكاسل

يا عزيمة الغدر خوري

ارفع رايتك …. تخاذل

آه يا نار الجمر …فوري

غضبة تحرق ديب و كاسر

اهدموها ،، اشعلوها …!!!

اخنقوا صوتي اللي طالع

م المواجع ،

حلم راجع ،

بالحقيقة والتاريخ

علّْي يا ارضي الصريخ

اغسلي توب المرار

اشعليها الف نار

لجل تبنيها عمار …!!

مهما راح مليون شهيد

الف صوت ح يكونوا صوتي

الف بيت ح يكونوا بيتي

ألف مدنة بالآذان راح تنادي

فيكِ يا لبنان ولادي

آه يا صابرة !!

كحلي عيونك بدمي

وابني مجدك من رمادي

فيكِ يا لبنان ولادي

ابني مجدك من رمادي

اعلنوها ،،

اعلنوها ،،صوت وصورة

مش ح تبقي غير بلادي ..!


أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

الأعلى