يا عم روح شوفلك دكان
هيه البلاد ناقصه مصايب
عامل مناضل وانت جبان
وفى النضال وسطك سايب
*****
*أما السياسه نجاسه بجد
حكومتها ولا معارضتها
يتخانقوا مين يركب ويشد
مين اللى يربح خسارتها
*****
*الله يكون فى العون يا بلاد
من المعارضه والحاكمين
خناقه بين حراميه شداد
واحنا اللى بين الاتنين ضايعين
*****
*داهيه تاخدكوا شبه بعضيكو
واشرف ما فيكو مع مصالحه
ويوم ما صوتنا يعريكو
فوق دمنا راح تتصالحوا
*****
*أحزابنا دى مجرد ملعوب
مقلب وحكوماتنا عملاه
علشان نبطل زقل الطوب
ونتوه بقى بين لأه وآه
*****
*أحزاب كده زى الدورات
المحصورين يرتاحوا فيها
وكلها حبة شعارات
باخت وفقدت معانيها
****
*طب نعمل أيه يعنى نبطل
ونسيب بلادنا للتجار
عمال تهبل وتهطل
وعاملى شاعر وانت حمار
****
*ياعم مين قالك سيبها
انا بس عايزك تبقى أروب
تعرف بجد اللى تاعبها
بدال ماتهرب م المطلوب
****
*لازم لها احزاب شعبيه
لأن دول يافطه وجرنان
ومعمولين لدواعى أمنيه
افهم بقى و بطل توهان
****
*أفهم بقى متجننيش
قال يعنى لسه أنا متجنيتش
ضحيت بأمك لجل تعيش
أهى برضه بنتك متعشتش
***
*أنا قصدى ماضى ومستقبل
يعنى اللى تزرعه راح تجنيه
وشعب عاقل مش أهبل
يخزق عنيين اللى يعّميه
****
*نرجع بقى لحكاية الحزب
لوانته أصلا كنت بانيه
حيبقى جد ما هواش كدب
والناس لابد حتؤمن بيه
الثلاثاء ٢٨ تشرين الثاني (نوفمبر) ٢٠٠٦
