اعترافات شاهد زور

أنا الحزين اللى كان شاهد وشايف

بيادات بتدهس على الخدود والشفايف

وناس غلابة بتشبه لاحتمال مخطوف

 

كان السبع جمرات معايا

عدى الزوال من ورايا، لعنت الظروف

وبوست أيد العسكرى لما رمالى الرغيف

سرق الشيطان قلبى وقعت اسيره

وعمانى خوفى لقتنى واقف وراه

اتارينى شاهد زور وقلبى خفيف

سألنى راجل عجوز الكعبة يابنى منين؟

تايه سبيل الحج وناس كتير تايهين

بين الغرق والحريق يسعوا ف طريق الآلام

دفع ولاد الغرقانين تمن السفينة الحرام

ومعادش باين لهم وسط العساكر نجاه

ولا عاد لدم الضحايا وقت ف عروق الحياه

 

من فين بقى حتشدنا من تانى أحلام الكفاح؟

وازاى حتخرج من حلوقنا الهتافات

ونستجيب للنبض عند اشتياق ارواحنا للجنه؟

من غير ما يعوج شيطان الغواية الصراط

أوتشتهينا شهوة التفاح

لما المشايخ فى شح المواسم يردحولنا ع الشاشات؟