الاثنين ٢٦ نيسان (أبريل) ٢٠١٠
بقلم أيمن عبد المقصود

هاموش

مش عارف ليه الناس حاسداني
مع إني باموت
كل ما صوت الفـُقـَرَا يفوت على طرْف وِدَاني
على أوضه فوق السطح باتكْتِك م البرد
مِسْتـَنـِّي الرد
كل مااشوف إعلان باتقدِّم
يمكن مره يصيبني الدور
ولأن الحاجَة تملـِّي من الإبداع
والحزن الأسْطه مش التبـَّـاع
علـِّمْنِي زماني المَغنـَى
بس نسيت في زحام افكاري اتأمِّل في وشوش الناس
يمكن مرة اوصل للمَعنى
مِسْتـَنـِّي الليلة تفوت
وعَدِتـْنـِي أم أصالة الدلالة بعربون لِطهور
بس الصُبح يشقشق
ليلة احْييها وتِحْييني يومين
محتاج أنفِد من تحت السور
وأزوَّغ م الضلمة اللي محاوطاني
واتشعلق في خِطان النور
ما باقولش حبال
عشمان في الخيط الدايب بس يبان
إيه الفرق ما بيني وبينك؟
من فينا الإنسان الإنسان؟
من فينا جعان؟
دماغي حتفصِل مِنـِّي
نفسي ف نفـَسِين دُخـَّان
عَجَّان الفرن اللي ف بدروم البيت لعَّان
والعجلاتي بيشتم بس جبان
سوَّاق اتوبيس الهيئة لوحدُه حكاية
طور مربوط في الساقية بيحلم بنهاية
أم حميده الدايه ، الله يجازيها
كل ولاده تجيها
تبعتلي من اللي يجيها
يمكن بختي التعبان يتغيَّـر
وأكون صَيِّيت أفراح مشهور في الحته
واللا يجيني التعيين ان شالله ف أيها حته
وساعتها توافق تديني حميده
وادخل دنيا قديمة جديدة
هي هترتاح من (بُؤ) من الستة
وانا حاتقلـَّد مِحْرات فوق كتفي
وحاكون الطور المجبور الخاطر.
في زمانـَّا،ما بقاش موجود سي السيد
كل الموجود من عَيِّنتي وعَيِّنتك
لا جناح ولا ريش
كل اللي بنترجاه م الأعيان بقشيش
أو كارت بتوصيَّه،
أو حلم بلقمة هنية،أو تـَرْقِيـَّة
لجل انا وانت نِهِم في شيل المحرات
لجل نعمَّر في الأرض اللي ما زالت بور
بس اياك تتجنن وتقرَّب لحدود السور
نام والخاطر مكسور
واحلم بخيوط النور
ما تقولش حِبال
بس انت اقفِش في الخيط لو واهي
لـُونك مخطوف مش زاهي
وطالعلي من الشـَق اللي مْدَخـَّل/
صواريخ الريح تتحداني
بتقول لي الناس حاسداني
إتأملني ولو لثواني
والله ما بَمْلِك غير ابريقي المكسور
ومعاه جلابيتي الكستور
ولباس لا مؤاخذه من الدَمُّور
ومرايتي الكالحة
وكوز كان في الأصل مبيد حشري
باعمل فيه الشاي السادة
فمتطلعشي من التليفزيون
وتقول للناس "حضرات السادة"
و لا " الإخـْوَة الوطنيين "
لإنك والمصحف تقصد ناس تانيين

أي رسالة أو تعليق؟

مراقبة استباقية

هذا المنتدى مراقب استباقياً: لن تظهر مشاركتك إلا بعد التصديق عليها من قبل أحد المدراء.

من أنت؟
مشاركتك

لإنشاء فقرات يكفي ترك سطور فارغة.

فيسبوك منبر حر للثقافة والفكر والأدب
تويتر منبر حر للثقافة والفكر والأدب
الأعلى