شجرة الصمت

فـ الصمت طلقت وذني

نتسنط لكلام الكون

فـ الكون

رميت شوفتي

نصيد طرف م لخوا

فين نسقر

ونكون

طجيت مني

طجيت منكم

مايواتيني غير الرحيل

مايواتيني غير نخيط

النهار مع الليل

نلبسهم دربالة

ونسيح

ونديع اهبيل

نتغوفل بسوالف الليل

نهتهت بكلام

ملقطو الريح

كيفو كيف لكذوب

ماعندوش اباه

نهرب

قبل مايسرقني الموس

قبل مايتقادو لكتاف

ويتقزب راسي

من بين الريوس

قبل مايخرف خريف لكلام

قبل ما عصاتو تغلط

اترشكـ فـ الجلد أو لعظام

قبل ما لغايا يتسوط

وانا لغايا عزيز

مقطر من عين الجرح

والجرح

جرحي

سم

وسوسة

جرحي مني

وخا يكون مجدام

نشركـ من قشابة الصمت

طرف

نستر بيه عمري المعري

عمري اللي شدها بـ جرية

طيح وراه

زيني وشيني

خلاني خاوية من كل عامر

عامرة بكل خاوي

اتشتت عقيقي

طاح م لقلب

اعشيقي

لخوا اكسى أرضي

ساح لون جلدي

سمايا الزرقة

لمزرزرة نجوم

اتطلام حموم

وطفات عيون النجوم

نهرب

منك

نهرب

مني

نهرب م لهروب

كتابتك لحلاحة

كلها كذوب

يسحاب لي احنا واحد

قريتك م لقفا

احنا جوج

ما احنا غير جوج

ولو تذوب الذات فالذات

وتولي فكف اليد جغمة

بنص كلمة

يتزاد من كرش الفرح

كلام مبيت ، بايت

بنص كلمة

اتحرق الشهوة

وتولي فراتت

يندب الليل

على عمرو هو

اللي عمرو ماليل ولا قيل

كيفو كيف الليالي

ونندب أنا على ليلي

اللي سهرتو

نتغزل

نغزل

نعزل

لخيط لبيض م لكحل

يصبح الصباح

تلقاني مكتفة كباب

نتلوى وجع السهير والجراح

حجلت قدام عيني

حروفك

حلفت بيميني

ماندويك بالمثني

فحروفي

حنثيني

نصوم

على ودك ألف عام

نهرب على ودك

نجاور الصمت

ونقبر فيا لكلام

حلفت بالمثلث

ماندويك فحروفي

ولا لونك ييجي على لوني

حلفت مانكون خاتم

فصباع ديك الورقة

لمكرراني بلا عصا

حلفت مانكون غير فرد

وإيلا كنا جوج

نخاوي الصمت

نلبس ليه كل يوم لون

نعاود ليه كل يوم

حكاية وماية

نغني ليه غنايا

موالي شكايا وبكايا

ونعيش صمتي

نظلل تحت حيطو

حتى نفنى

تطلع شجرتي

عروشها

عروقي

وشروقي

م لعام للعام

تنوح بنواحي

تبرح تبراحي

تغني موالي

للزايرين قبة الصمت بحالي

للي جرى عليهم اللغيط

وتقرقيب الناب

ولالا ومالي

آه ياشجرة صمتي

نفنى آنا

وجدرك مافاني

خلي عويد منك

يرسم الطريق لقبري

فـ السما

فـ الأرض

فـ لما

فين ما عاش الصمت

ذاتي مرهونة

فين ما مات الصمت

ذاتي مدفونة.