لحظة مخاض الحلم، ثورة
لحظة ما شق النور طريقه
وابتدينا نكتشف من غير مغامرة
اننا بنحبها
نعشق ترابها وشمسها
وندوب في طيبة شعبها
اللي حكايته في حبها تطفى حريقه
لحظة مخاض الحلم، ثورة
نورت قلبك الجدع،
اللي شاف فيها البدع،
واللي وشوشله الودع،
انها راحت خلاص
وما فيش خلاص،
غير انه يبكي ع اللي فاضل منها
رغم انها لساها شابه بحسنها
والكل طالب ودها،
وهوا لسه يحبها رغم الخلاص
لحظة مخاض الحلم، ثورة
فجرت جوه الجدع الف طاقة للضمير
وابتدى نبضه يغير على عرضها
اللي استباحه كل باغي اكمنها قلب و كبير
مكشوف انا ضهري وكسير،
يا الف طاقة للضمير،
اتفجري ، واغزلي توبها الحرير
لجلن ما اصونه عرضها
اللي استباحه كل خاين أو أجير،
لحظة مخاض الحلم، ثورة
زلزلت كل العوالم والشخوص
والوشوش بانت وظهر المستخبي فِ النفوس
اللي هلل، واللي طبل واللي باع واللي اشتري
ملعون ابو دية فلوس اللي تخلينا نتبت في الجلوس
ونهين طريقنا وشعبنا والآخرة دود ينخر وسوس
لحظة مخاض الحلم ،، ثورة....
الأحد ١٣ شباط (فبراير) ٢٠١١
