لساك بتحلم باللقا !!!
لسه عايش ذكرياتك !!!
لسه بتخبى فـ ملامحك
آهة عايشة فى اغنياتك
طالع سلالم غربتك
والصوت بينده من بعيد
اطلع كمان
حلمك بعيد
اوعاك تبص وراك للى بيندهوك
اطلع كمان
عدى الحدود
الارض مفهاش الونس
واللى انهاردة مصدقينك ...
بكرة اكيد هيكدبوك
اطلع كمان
اطلع كمان ادام عينيهم
كل دمعة من عينيك
انزفها واحد
وحّد طريقك مالغريب
الغى حروف العطف بينكم ،
سوّر حدود التورية
عمر جِناسه ما خلق ... فى يوم حبيب
اطلع كمان
اشباح ماضيك ماسكة الصور جوة قطر الذكريات
اشباح ماضيك
ماسكة الصور ...
جوة قطر الذكريات
وانت
وانت بتتفرج عليك
مرسوم تهكم عالوجوه
مجنون هواك
لا خنت فى يوم عشان خانوا
ولا حبيت عشان حبوا
ولا خبيت عشان خبوا
غريب انت
غريب انت فى اعرافهم
غريب انت فى حكاويهم وحواديتهم
غريب انت فى كل لسان
اطلع كمان
من مبتدى الاحلام ....
وانت عاشق كل تفاصيل المدى
قلبك برغم انو عليل
لابس مرايا مُكبِرة
شايفة التفاصيل اللى خجلانة تبين نفسها
شايفة الحقيقة مُجردة من غير هوى
................
قلبك هوى
.......
وسباع بشر..
فاتحة لبراءتك بقها
فى غابة زمانهم ياضعيف
ماقدرت تبقى مفترس
ولا هتقبل ...تكون فريسة حلمهم
اجدر قلوعك من الهوا
عيش انهاردة بذنبهم
موت انهاردة بذنبهم ....
وبكبريائك
يمكن تعيش فيهم سؤال
.......
......صعب المنال
يمكن تعيش فيهم سؤال
صعب المنال
الأربعاء ١٥ آب (أغسطس) ٢٠٠٧
