السلطانية
انا قلت اجيبها بالمقاس
قد الراس
ولا المداس
صحابنا هم يقلوظوها
بكل همة
يا دى الحماس
.......
حماس دى مين
يا بنى استكين
هو احنا يعنى اللى مرتاحين؟
يا فقرى هو انت تطول
انه بنفسه سلطان الغول
يلبسك بيده السلطانية
دى حتى قيمة
وحتة سيما
تغير أَلاون عالجلابية
وان لبست يا حلو بدلة
زى الرزية تزين نافوخك
يا سلام تقلوظ
لا كلام تتخن
بهتاف تشوشر
طول مانت لابس السلطانية
راسك دى كنز
خليها حرز
جلبة حديد
بيقفلوها كمان ببنز
آنون حاميك
ويداوى فيك
لا تقول قضاه
لا تقول صحافة
دى بلدنا هى ام الفكاكة
تكتب انت اللى انت عاوزه
وهم عليهم السلطانية
يا سلام يا عم
عيشة هنية
والسلطانية انواع كتير
تاخد مقاسك على دماغك
او مرة تقفل يمين مداسك على شماله
والسلطانية لأجلك تتقسم
نصين يا باشا
آخر شياكه
يضم يدك شمال يمين
شفت الحِنَيّن.....
اصلك يا جاهل
مبعتر ف بعضك
وهم بس اللى يلموا خيبتك
دى ناس آلاجة
آخر تناكة
إنما لعَندَك...يهموا جنبك
يشدوا عِندَك
بهدية ملكى
يتوجوك
على بغلة حمرا يركبوك
شقلوب تجاهك
يهدوا داغك
ويهدوا ليك
شئت و أبيت
السلطــــــــانية
الأحد ٢٣ تموز (يوليو) ٢٠٠٦
