البنت آلاء اللى رباها أبوها ع الحريه
فجأه اكتشفت إن المدرسه مش للعلم
اكتشفت إن المدرسه معموله عشان
تقتل فيها شجاعة التفكير
و براءة الحلم
وبكل بجاحة وغباء القهر
تحبسها ف صوتها بتهمة خوفها
من غول الشر الأمريكى على مصر
*******
يا آلاء ياحبيبتى
يابنت الأرض السمرا
و بنت شجرها وسواقيها ونيلها
يا كلمة حق بريئه
يا شمعة صدق جريئه
أنا نفسى أبوسك
وأعلق صورتك فى مكتبتى
علشان لما الإحباط يهزمنى
أبص ف وشك واتأكد إن بلدنا بخير
وان المصريين صاحيين
وان بنات (شربين)
ما لهومش ف مسخرة التلفزيون
ولا فى ( الشات) التافه
ولا فى(الفديو كليب) المجنون
لكن ليهم فى الخوف ع الطين وفلسطين
ليهم بكره اللى حيجى ينور عتمة ليلها
غصبن عن( عين) أم أمريكا
و(عين) ألا ضيشها و دلاديلها.
الخميس ٢٩ حزيران (يونيو) ٢٠٠٦
